De Maya-Bargen (engelsch Maya Mountains, spaansch Montes Maya) sünd en Barggrupp in Belize un in’n Oosten von Guatemala (Departamento Petén). De höögsten Bargen sünd Doyle’s Delight mit 1.124 m över de See un de Victoria Peak mit 1.120 m över de See. De Naam von de Bargen kummt dor von, dat dat Rebeed von öllers to de Heimaat von de Maya tellt. Vondaag leevt dor Mayas ut de Gruppen von de Mopan un de Kekchi. Dat gifft in dat Rebeed ok en ganze Reeg von Maya-Ruinensteden, so as Lubaantun, Nim Li Punit, Cahal Pech, Xunantunich, Ixcún un Chaa Creek.
In’n Westen un Noordwesten grenzt de Bargen an dat Becken von Petén. In’n Noordoosten, Oosten un Süüdoosten slütt sik dat siede Küstenland von Belize langs den Golf von Honduras an.
De Bargen bestaht vör allen ut Oorwoold. Dörper gifft dat blots in de Randrebeden. De Oorwoold is dör verscheden Schuulrebeden schuult, ünner annern de Cockscomb Basin Wildlife Sanctuary.